സ്നേഹിച്ചു തോറ്റു പോയവളോട്..

എന്നെ പ്രണയിച്ചു തോറ്റു പോയവളെ,
നീ ആ പ്രണയത്തെ തെമ്മാടിക്കുഴിയിലടക്കുക.
വെറുപ്പിൽ ചവച്ചുതുപ്പിയ ചുവന്ന  പൂക്കൾ
ആ കുഴിമാടത്തിൽ ചൊരിയുക.
നിന്റെ ഹൃദയത്തിൽ തറഞ്ഞ മുള്ളുകൾ
കൊണ്ടൊരു മുൾക്കിരീടം ഉണ്ടാക്കുക..
അതെന്റെ തലയിൽ ചാർത്തുക..
നിന്റെ ഹൃദയരക്തത്തിൽ  ആളിപ്പിടിച്ച അഗ്നിയിൽ
എന്റെ ഓർമകളെ കരിച്ചു കളയുക..
കണ്ണീരുകൊണ്ടു നീ തീർത്ത കടലിൽ
അതിന്റെ ചാരം ഒഴുക്കി കളയുക..
മരിച്ചവന്റെ തിരുശേഷിപ്പുകൾ
വഴിയരികിലെ ചവറു കൂനയിൽ തള്ളുക..
എന്നിട്ടും ഞാൻ നിന്നിൽ ശേഷിക്കുന്നുണ്ടെങ്കിൽ
അതു ഞാനല്ല,  നീയാണെന്നു കരുതുക..