ചാവ് വിളി

യാത്ര ചത്തവരുടെ ഒപ്പം ആണ്
ജീവനില്ലാത്ത കണ്ണുകൾ
ഇഴയുന്ന കാലുകൾ
യാത്ര നാലു വശത്തേക്കുമാണ് ..

വഴിയിറമ്പുകളിലെ ഇരുട്ടിനു
മൂക്കു തുളയ്ക്കുന്ന നാറ്റമില്ല..
മണവുമില്ല..
ഗുഹ പോലെ മൂക്കു വെറുതെ
തുറന്നിരിക്കുന്നു..

പിന്നിട്ട വഴികളിലെ ദൈവങ്ങൾക്കു
ഇപ്പോഴും ചത്ത ചിരി മാത്രം..
പ്രാർഥന ചൊല്ലാൻ വായ തുറന്നിട്ടില്ല..
നട്ടെല്ലു കൂനി തൊഴുതതുമില്ല..

ജീവിച്ചവർക്കൊപ്പം യാത്ര ചെയ്തപ്പോഴും
ദൈവം ചിരിച്ചത് ചത്ത ചിരി തന്നെ..
കണ്മുന്നിൽ നരകം കത്തുമ്പോഴും
ചിരിക്കാൻ മാത്രം വിധിക്കപ്പെട്ട ദൈവം..

ചത്തവരുടെ കണ്ണുകൾ
ഇരുട്ടിൽ കാഴ്ച തേടുന്നു..
നിഴലുകൾ കരിന്തേൾ പോലെ
വിഷവാലുകൾ കൊണ്ടു കൊമ്പു കോർക്കുന്നു..

കാമനകൾ പതിവു പോലെ
ചീഞ്ഞു ചലം വമിക്കുന്നു..
ജീവനുള്ള ഗർഭപാത്രത്തിലെ
അലസിപ്പോയ ഭ്രൂണങ്ങൾ..

ചാവ് വിളി വരും മുന്നേ
ചത്തവർക്കൊപ്പം നടക്കുക.
ചത്തവന്റെ മൗനത്തോട്
ജീവനുള്ള മൗനം ചേർത്ത് നടക്കുക..