തണൽ മുറിക്കുന്നവൻ...

നീ തറഞ്ഞു നിൽക്കുന്ന
അസ്വാതന്ത്ര്യത്തിനു കീഴെ
ഞാനെന്റെ കൂടു കൂട്ടിയിരിക്കുന്നു..
നിന്റെ നിഴൽ തിരിയുന്നതിനൊപ്പം
ഞാനും തിരിഞ്ഞു കൊണ്ടേയിരിക്കുന്നു.
നിന്റെ നിഴൽ പാദങ്ങളോടൊട്ടുമ്പോൾ
ആ പാദങ്ങളിൽ ഞാൻ അഭയം തേടുന്നു..
നിന്റെ നിഴലിനു നീളം വെക്കുമ്പോൾ
ഞാനെന്റെ യാത്രയുടെ നീളം കൂട്ടുന്നു..
നിന്റെ നിഴൽ
പ്രകാശത്തിൽ വിലയം പ്രാപിക്കുന്നിടത്തു
എന്റെ യാത്ര അവസാനിക്കുന്നു..
നിന്റെ നിഴൽ ചുരുങ്ങി ഒതുങ്ങുമ്പോൾ
ഞാനും ഒരു അട്ടയെ പോലെ ചുരുണ്ടു കൂടുന്നു..
നീയേൽക്കുന്ന വെയിലിനു കീഴെ
എന്റെ കണ്ണുകൾ ഉറക്കം തേടുന്നു...
നിന്റെ ഉടലേൽക്കുന്ന ചൂടിന്റെ തണലിൽ
ഞാനെന്റെ ഉടൽ ഒളിപ്പിക്കുന്നു ..
എന്നിട്ടും ഞാൻ നിന്റെ ചുവടറക്കുന്നു..
ബന്ധനങ്ങളിൽ നിന്നും മോചിപ്പിക്കുന്നു..