നിൻ ഹൃദയത്തിൽ ഞാനാഴ്ത്തിയ കടാരപിടിയിൽ ഒലിച്ചിറങ്ങിയതത്രയുമെൻ കണ്ണീരും ചുടു ഹൃദയരക്തവും

നിൻ ഹൃദയത്തിൽ
ഞാനാഴ്ത്തിയ  കടാരപിടിയിൽ
ഒലിച്ചിറങ്ങിയതത്രയുമെൻ
കണ്ണീരും ചുടു ഹൃദയരക്തവും..

അരുതെന്നൊരായിരം വട്ടം
ആന്തലോടെൻ ഉള്ളലറി
അലച്ചു പിടഞ്ഞിട്ടും,
ചുടലമുള്ളിന്നൊരു ചുറ്റു
ഇടനെഞ്ചിൽ പാമ്പു
പോൽ ചുറ്റി  പിണഞ്ഞിട്ടും, 
അയഞ്ഞില്ലയെൻ കൈകൾ
നിന്നുയിരിൽ നിന്നു ഞാൻ
ഒരു ശിഖരം പോലറ്റു വീഴും വരെ..

നിന്റെ നിനവിലൊരിക്കലും
തെളിയില്ല ഞാനെത്ര
ഇരുളിലേക്കാണ്ടു പോയാ
 ക്രൂരകർമത്തിനിപ്പുറം,
ഒരുവേള നീയറിഞ്ഞിരുന്നെ-
ങ്കിലെന്നാശിച്ചു നിൻ
നിണമൊഴുകിപ്പരന്നതെൻ
കരൾപിളർപ്പിലൂടെന്നതും..