വറ്റുന്ന കടൽ

 കടൽ വരളുകയാണ്..

തുള്ളിപോലും ശേഷിക്കാതെ ..

അലകളേറ്റു വാങ്ങി തരിച്ച കര

തനിച്ചൊരു  മരുഭൂവിനി..

ആരവമിനിയില്ല

എണ്ണിയാൽ തീരാ

തിരകളുടെ..

ഇല്ലയിനി കണ്ടു മതിവരാ അസ്തമയങ്ങളും..

ചുവക്കില്ലൊരിക്കലും ചക്രവളങ്ങൾ

പ്രണയ രേണുക്കളാൽ..

മടങ്ങിവരില്ല 

എരിഞ്ഞടങ്ങുന്നോരീ  സൂര്യൻ

മറ്റൊരു പുലരിയായി ..

നനവിനിയില്ല മണലിൽ

ചിത്രമെഴുതുവാൻ,

വരികയുമില്ല തിരയത്

മായ്ക്കുവാൻ ..

ഉരുമ്മി നടന്ന പ്രണയപാദങ്ങൾ

പതിയില്ലിനിയിവിടം

 തരളിതമാക്കുവാൻ..

കരിഞ്ഞു  വീഴും ഇവിടെ,

കടൽ തേടി പറന്ന പക്ഷികൾ...

ഹൃദയം കൊരുത്ത ചൂണ്ടയിൽ

പിടയും മീൻ ഒരിറ്റ് നീരിനായി..

കര തേടിവരില്ലൊരു നൗകയും

തെളിയില്ലിനിയീ  വിളക്ക് മരവും..

കടൽ തഴുകി തണുത്ത കാറ്റിനി,

കുളിരണിയിക്കില്ലയൊരിക്കലും..

കരയിനി വെറുമൊരു മൺകൂന

അതിനടിയിലഴുകും

അനക്കമറ്റൊരായിരം

ജീവൽ സ്പന്ദങ്ങൾ..